Luka
Luka chapters 1:1-2:52 & 3:21-38

Luka 1

1Kũrĩ mũgaathe Theofilo: Andũ aingĩ nĩmarĩĩkĩĩtie kwandĩka ũhoro wa maũndũ marĩa marĩĩkĩĩtie kuoneka gatagatĩinĩ gaitũ. 2Maandĩkire kũringana na ũrĩa twaheetwo ũhoro nĩ andũ arĩa meyoneire maũndũ macio kuuma o kĩambĩrĩria, o na arĩa maahunjagia ũhoro. 3Na rĩu mũgaathe Theofilo, nĩ ũndũ nĩnduĩrĩĩtie maũndũ macio wega kuuma o kĩambĩrĩria, nĩngwĩciiria atĩ nĩ wega ngwandĩkĩre maũndũ macio na njĩra ya mũtaratara wa ũrĩa meekĩkire. 4Ngũkwandĩkĩra nĩ geetha ũmenye ũũma wa maũndũ marĩa ũrutĩĩtwo.
Kũmenyithanio ũhoro wa gũciarwo kwa Johana Mũbatithania
5Hĩndĩ ĩrĩa Herode aarĩ mũthamaki wa Judea, nĩkwarĩ mũthĩnjĩri Ngai wetagwo Zakaria, na aarĩ wa gĩkundi kĩa athĩnjĩri Ngai a Abija. Mũtumia wake eetagwo Elizabethi na aarĩ wa mũhĩrĩga wa Harũni.
6Eerĩ maatũire marĩ athingu mbere ya Ngai, na nĩmaathĩkagĩra mawatho ma Mwathani o hamwe na maathani maake. 7Matiarĩ na mwana nĩ ũndũ

Elizabethi aarĩ thaata, na eerĩ maarĩ akũrũ mũno.

8Na rĩĩrĩ, mũthenya ũmwe Zakaria aarĩ Hekaarũ thĩinĩ akĩruta wĩra wake wa ũthĩnjĩri Ngai, tondũ rĩarĩ ihinda rĩa gĩkundi kĩrĩa aarĩ wakĩo gũtungata kũu Hekaarũinĩ. 9Rĩrĩa mĩtĩ yacuukirwo, kũringana na mũtugo wa athĩnjĩri Ngai, Zakaria nĩathuurirwo agacinĩre Ngai ũbaani thĩinĩ wa Hekaarũ. 10Na rĩĩrĩ, andũ oothe nĩkũhooya maahooyaga na kũu nja hĩndĩ ĩrĩa ũbaani wacinagwo.
11Naake arĩ kũu thĩinĩ, mũraika wa Mwathani akĩmuumĩrĩra, akĩrũũgama mwena wa ũrĩo wa kĩgongoona gĩa gũcinĩrwo ũbaani. 12Rĩrĩa Zakaria aamuonire, akĩmaka na agĩĩtigĩra. 13No mũraika ũcio akĩmwĩra atĩrĩ, “Zakaria, tiga gwĩtigĩra! Ngai nĩaiguĩte mahooya maaku, na mũtumia waku Elizabethi nĩegũgũciarĩra kahĩĩ, na ũgaagatua Johana. 14Wee nĩũgaakena, na ũcanjamũke, na andũ angĩ aingĩ nĩmagaakena rĩrĩa gagaaciarwo! 15 Nĩ tondũ gagaakorwo karĩ mũndũ mũnene mbere ya Mwathani. Gatikaanyuaga ndibei kana njoohi, ningĩ gagaakorwo kaiyũrĩĩtwo nĩ Roho Mũtheru o na karĩ ndainĩ ya nyina, 16nako nĩgagacookia andũ aingĩ a Isiraeli kũrĩ Mwathani Ngai wao. 17 Ningĩ nĩgagaathiĩ mbere ya Mwathani na roho na hinya o ta wa Elija ũrĩa warĩ mũnabii. Nĩgagaatũma maithe meendane na ciana, kagarũre andũ arĩa aaganu maambĩrĩrie gwĩciiria maũndũ ma ũthingu na nĩgakaahaarĩria andũ nĩguo meeterere Mwathani.”
18Naake Zakaria akĩũria mũraika atĩrĩ, “Ngaakĩmenya maũndũ macio atĩa na niĩ ndĩ mũkũrũ na mũtumia wakwa o naake no mũkũrũ?”
19 Naake mũraika akĩmũcookeria akĩmwĩra atĩrĩ, “Nĩ niĩ Gaburieli, ũrĩa ũrũũgamaga mbere ya Ngai, ũrĩa ũndũmĩĩte njũke ngũhe ũhoro ũyũ mwega. 20Atĩrĩĩrĩ, tondũ nĩwarega gwĩtĩkia ũhoro ũcio ndakwĩra, ũgũtuĩka buubu; ndũgũcooka kwaria kinya mũthenya ũrĩa ũndũ ũcio ndakwĩra ũkaahinga, mahinda maaguo marĩa maagĩrĩire makinya.”
21Na rĩĩrĩ, hĩndĩ ĩyo yothe andũ no gweterera meetereire Zakaria oime, na nĩmaarigagwo nĩ kĩrĩa gĩatũmĩĩte aikare ũguo thĩinĩ wa Hekaarũ. 22Rĩrĩa oimire, ndahotaga kũmaarĩria, na nĩ ũndũ ũcio magĩkĩmenya atĩ nĩoneete kĩoneki e kũu Hekaarũ thĩinĩ. Naake agĩkĩambĩrĩria kũmahe ũhoro na mooko, na kuuma hĩndĩ ĩyo agĩikara arĩ o buubu.
23Rĩrĩa matukũ maake ma gũtungata thĩinĩ wa Hekaarũ maathirire, akĩinũka gwake mũciĩ. 24Na rĩĩrĩ, matukũ manyiinyi mathira, mũtumia wake Elizabethi akĩgĩa nda. Naake Elizabethi agĩgĩtũũra ehithĩĩte ihinda rĩa mĩeri ĩtaano akiugaga atĩrĩ, 25“Rĩu Mwathani nĩandeithĩĩtie nĩguo eeherie gĩconoko gĩakwa gatagatĩinĩ ka andũ!”

Mariamu kũmenyithio nĩegũciara Jesũ

₂₆ Na rĩĩrĩ, mweriinĩ wa ĩtandatũ wa Elizabethi gũkorwo e na nda-rĩ, Ngai nĩatũmire mũraika Gaburieli itũũrainĩ rĩa Galili rĩrĩa rĩĩtagwo Nazarethi. ₂₇ Aamũtũmire kũrĩ mũirĩĩtu thingi worĩĩtio nĩ mũndũ wetagwo Josefu warĩ wa rũciaro rwa mũthamaki Daudi. Mũirĩĩtu ũcio eetagwo Mariamu. ₂₈ Mũraika ũcio agĩgĩthiĩ kũrĩ Mariamu akĩmũgeithia atĩrĩ, “Wĩ mwega? Wee wĩ mũraathime mũno! Mwathani arĩ hamwe nawe!”

₂₉ Naake Mariamu agĩgĩtangĩka ngoro mũno nĩ ũndũ wa ngeithi icio cia mũraika, na akĩrigwo nĩ ũrĩa ciugo icio ciendaga kuuga. ₃₀ Naake mũraika akĩmwĩra atĩrĩ, “Mariamu, tiga gwĩtigĩra nĩ gũkorwo Ngai nĩagũtaanahĩire. ₃₁ Nĩũkũgĩa nda, ũciare kahĩĩ, na ũgaagatua Jesũ. ₃₂ Nako nĩgagaatuĩka mũndũ mũnene, na gageetagwo Mũrũ wa Ngai Ũrĩa Ũrĩ Igũrũ Mũno. Mwathani Ngai nĩagaagatua mũthamaki o ta ũrĩa ithe Daudi aarĩ mũthamaki. ₃₃ Agaagatua mũthamaki wa andũ a Isiraeli tene na tene; ũthamaki wako ndũgaathira!”

₃₄ Naake Mariamu akĩĩra mũraika ũcio atĩrĩ, “Niĩ ndĩ mũirĩĩtu thingi. Ũhoro ũcio ũngĩkĩhoteka atĩa?”

₃₅ Naake mũraika akĩmũcookeria akĩmwĩra atĩrĩ, “Roho Mũtheru nĩagooka kũrĩ we, naguo hinya wa Ngai nĩũgaakũhumbĩra. Nĩ ũndũ ũcio mwana ũcio ũgaaciara ageetagwo ũrĩa mũtheru, Mũrũ wa Ngai. ₃₆ Nĩũkũririkana mũtumia ũrĩa wanyu wĩtagwo Elizabethi ũrĩa weragwo atĩ ndangĩgĩa mwana, rĩu o naake ũkũrũinĩ wake nĩagĩĩte, na ũyũ nĩguo mweri wake wa gatandatũ kuuma rĩrĩa aamĩgĩire. ₃₇ Atĩrĩĩrĩ, gũtirĩ ũndũ ũngĩrema Ngai.”

₃₈ Naake Mariamu agĩkiuga atĩrĩ, “Niĩ ndĩ ndungata ya Mwathani; kũrotuĩka kũrĩ niĩ o ũguo woiga.” Naake mũraika akĩmũtiga agĩĩthiĩra.

Mariamu gũthiĩ gũceerera Elizabethi

39Matukũinĩ o ro macio Mariamu nĩathiire ahiũhĩĩte itũũrainĩ rĩarĩ bũrũriinĩ ũrĩa ũrĩ irĩma wa Judea. 40Na rĩĩrĩ, aathiĩ agĩtoonya nyũmba gwa Zakaria akĩgeithia Elizabethi. 41Na rĩĩrĩ, hĩndĩ ĩrĩa Elizabethi aiguire ngeithi cia Mariamu, mwana ũrĩa warĩ nda yake akĩambarara, naake Elizabethi akĩiyũrwo nĩ Roho Mũtheru, 42akĩanĩrĩra na mũgambo mũnene akiuga atĩrĩ, “Wee ũrĩ mũraathime gatagatĩinĩ ka atumia oothe, na mwana ũrĩa ũgaaciara nĩmũraathime! 43Nĩ kĩĩ gĩgũtũma ũndũ mũnene ta ũyũ woneke kũrĩ niĩ, atĩ nyina wa Mwathani wakwa agooka kũnjeerera? 44Nĩ amu mũgambo wa ngeithi ciaku wakinya matũinĩ maakwa o ro ũguo, mwana ũrĩa ũrĩ thĩinĩ wakwa nĩambarara e na gĩkeno. 45Na kaĩ kũraathimwo nĩ we nĩ ũndũ wa gwĩtĩkia atĩ ũhoro ũrĩa werirwo nĩ Mwathani nĩũkaahinga-ĩ!”
Rwĩmbo rwa kũgooca rwa Mariamu
46 Naake Mariamu akiuga atĩrĩ,
“Ngoro yakwa nĩragooca Mwathani
47na roho wakwa nĩũkeneete nĩ ũndũ wa Ngai Mũhonokia wakwa,
48 nĩ ũndũ nĩaririkanĩĩte kwĩnyiihia kwa ndungata yake ya mũirĩĩtu!
Kuumagia rĩu njiarwa ciothe irĩnjĩtaga mũraathime,
49nĩ ũndũ wa maũndũ manene marĩa Ngai ũrĩa wĩ hinya anjĩkĩĩte.
Rĩĩtwa rĩake nĩ rĩtheru.
50Tha ciake nĩikinyagĩra arĩa oothe mamũtĩĩĩte,
kuuma rũciaro rũmwe kinya rũrĩa rũngĩ.
51Nĩonanĩĩtie hinya wa guoko gwake,
nĩahurunjĩĩte arĩa etĩĩi na mĩbango yao yothe.
52 Nĩehereetie athamaki kuuma itĩinĩ ciao,
na akanenehia arĩa matarĩ kĩene.
53Nĩahũũnĩĩtie arĩa ahũũtu na mawega maingĩ,
na akaingata itonga itarĩ na kĩndũ.
54Nĩaigĩĩte kĩrĩĩkanĩro kĩrĩa eerĩire maithe maitũ,
na nĩateithĩĩtie Isiraeli ndungata yake,
55 o ta ũrĩa eerĩire maithe maitũ, atĩ nĩakaiguĩra Aburahamu tha,
o hamwe na njiarwa ciake tene na tene!”
56Naake Mariamu agĩikara na Elizabethi ta mĩeri ĩtatũ, agĩcooka akĩinũka.
Gũciarwo kwa Johana Mũbatithania
57Na rĩĩrĩ, ihinda rĩa Elizabethi rĩa kũheeo mwana nĩrĩakinyire, naake agĩciara kahĩĩ. 58Nao andũ arĩa maarigainie, na andũ a nyũmba yao maigua ũrĩa Mwathani aamũtugĩĩte, oothe magĩkenanĩra naake.
59 Mũthenya wa kanaana wakinya, makĩũngana nĩguo magakaruithie, nao meendaga gũgatua Zakaria o ta ithe. 60No nyina akiuga atĩrĩ, “Aaca! Gegũtuuo Johana.”
61Nao andũ makĩmwĩra atĩrĩ, “Gũtakĩrĩ mũndũ wa nyũmba yanyu wĩtagwo ũguo!” 62Magĩcooka makĩarĩria ithe wa kaana kau na mooko makĩmũũria rĩĩtwa rĩrĩa eendaga gatuuo.
63Naake Zakaria akĩũria aheeo kabaaũ ga kwandĩkĩra akĩandĩka atĩrĩ, “Rĩĩtwa rĩako nĩ Johana.” Nao andũ oothe makĩmaka mũno. 64O hĩndĩ ĩyo Zakaria akĩhota kwaria rĩngĩ akĩambĩrĩria gũkumia Ngai. 65Nao andũ oothe arĩa maarigainie makĩiyũrwo nĩ guoya, naguo ũhoro wa maũndũ macio moothe ũkĩhunja bũrũri wa irĩma wothe wa Judea. 66Mũndũ o wothe waiguaga ũhoro ũcio nĩeciiragia na akeyũria atĩrĩ, “Kaĩ kaana gaaka gagaatuĩka ũũ?” Tondũ nĩkwonekaga wega atĩ hinya wa Mwathani warĩ hamwe nako.
Ũrathi wa Zakaria
67Hĩndĩ ĩyo Zakaria ithe wa kaana kau, akĩiyũrwo nĩ Roho Mũtheru akĩratha akiuga atĩrĩ:
68“Mwathani Ngai wa Isiraeli arokumio!
Tondũ nĩateithĩĩtie andũ aake, akamakũũra.
69Nĩatũheete mũhonokia mũnene,
ũrĩa uumĩĩte rũciaroinĩ rwa Daudi ndungata yake,
70o ta ũrĩa eeranĩire kuuma tene na tũnua twa anabii aake atheru,
71atĩ nĩagaatũhonokia kuuma kũrĩ thũ ciitũ,
na kuuma mookoinĩ ma andũ oothe arĩa matũmeneete.
72Nĩoigire atĩ nĩakaiguĩra maithe maitũ tha,
na aririkane kĩrĩĩkanĩro gĩake gĩtheru.
73Nĩerĩire ithe witũ Aburahamu na mwĩhĩtwa
74atĩ nĩagaatũhonokia kuuma mookoinĩ ma thũ ciitũ,
na atwĩtĩkĩrie tũmũtungatagĩre tũtarĩ na guoya,
75tũrĩ athingu na tũrĩ atheru mbere yake,
matukũ moothe marĩa tũgũtũũra muoyo.
76 “Nawe kaana gaaka, nĩũgeetagwo mũnabii wa Ngai Ũrĩa Wĩ Igũrũ Mũno.
Nĩũgaathiĩ mbere ya Mwathani kũmũthondekagĩra njĩra ciake.
77Ũgaathiĩ kwĩra andũ aake atĩ nĩmekũhonokio
na ũndũ wa kwoherwo meehia maao.
78Ngai witũ e tha na nĩ mũkirĩrĩria.
Nĩagaatũma tũthererwo nĩ ũtheri wa ũhonokio,
79 uume igũrũ ũtherere andũ oothe
arĩa matũũraga ndumainĩ na kĩĩruruinĩ gĩa gĩkuũ,
na acookie magũrũ maitũ njĩrainĩ ya thaayũ.”
80Nako kaana kau gagĩgĩkũra, gakĩgĩaga na hinya ngoro. Naake aatũũrire werũinĩ kinya mũthenya ũrĩa eyumĩririe kũrĩ andũ a Isiraeli.

Luka 2

Gũciarwo kwa Jesũ
(Mat 1.18-25)
1Na rĩĩrĩ, matukũinĩ macio mũthamaki wetagwo Augusito nĩathanire atĩ andũ oothe thĩinĩ wa ũthamaki wothe matarwo. 2Gũtaranwo kũu nĩkuo kwarĩ kwa mbere gwĩkwo rĩrĩa Kuirinio aarĩ barũũthi wa Siria. 3O mũndũ nĩagĩthiire kwĩyandĩkithia o itũũrainĩ rĩake kĩũmbe.
4O naake Josefu nĩambatire akiuma itũũra rĩa Nazarethi, bũrũriinĩ wa Galili, agĩthiĩ itũũra rĩa Bethilehemu bũrũriinĩ wa Judea, kũrĩa mũthamaki Daudi aaciarĩirwo. Aathiire kuo nĩ ũndũ aarĩ wa nyũmba na rũciaro rwa Daudi. 5Aathiire kwĩyandĩkithia hamwe na Mariamu, mũirĩĩtu ũrĩa oorĩĩtie. Hĩndĩ ĩyo Mariamu aarĩ na nda. 6Me kũu Bethilehemu-rĩ, hĩndĩ ya Mariamu ya kũheeo mwana ĩgĩkinya. 7Naake agĩgĩciara kahĩĩ gaake ka irigithaathi, agĩkooha na cuka, agĩgakomia mũharatĩinĩ, nĩ amu gũtiarĩ na handũ mangĩakomire mũkaawainĩ.
Arĩithi na araika
8Nakuo kũu bũrũriinĩ ũcio nĩkwarĩ na arĩithi maikaire werũinĩ, makĩrangĩra mahiũ maao. 9Mũraika wa Mwathani akĩmoimĩrĩra, naguo riiri wa Ngai ũkĩmatherera mĩena yothe, nao magĩĩtigĩra mũno. 10Naake mũraika ũcio akĩmeera atĩrĩ, “Tigaai gwĩtigĩra! Njũkĩĩte kũmũreehere ũhoro mwega, ũrĩa ũgũtũma andũ oothe makene mũno! 11Ũtukũ wa ũũmũũthĩ, thĩinĩ wa itũũra rĩa Daudi nĩmũciarĩirwo mũhonokia, nĩ we Kristũ Mwathani! 12Naguo ũhoro ũcio mũrĩũmenya na njĩra ĩno: nĩmũrĩona gakenge karigiicĩirio cuka, na gagakomio mũharatĩinĩ.”
13Na rĩĩrĩ, ihinda o rĩu mbũtũ nene ya araika ĩkĩoneka ĩ hamwe na mũraika ũcio, nao makĩambĩrĩria gũkumia Ngai makiugaga atĩrĩ:
14“Ngai ũrĩa ũrĩ igũrũ mũno arakumio,
nakuo thĩ kũrogĩa na thaayũ
gatagatĩinĩ ka andũ arĩa mamũkenagia!”
15Rĩrĩa araika maambatire magĩcooka igũrũ magĩtiga arĩithi acio-rĩ, nao makĩĩrana atĩrĩ, “Nĩtũthiĩi Bethilehemu tũkeyonere ũndũ ũcio Mwathani atũmenyithia.”
16Magĩgĩthiĩ mahiũhĩĩte, magĩkora Mariamu na Josefu, na makĩona gakenge gakomeetio mũharatĩinĩ. 17Na rĩĩrĩ, rĩrĩa maakoonire, makĩĩra nyina na ithe ũrĩa mũraika oigĩĩte ũhoro wako. 18Nao arĩa oothe maiguire ũrĩa arĩithi acio moigire makĩgega. 19Nowe Mariamu agĩikara akĩririkanaga maũndũ macio moothe na akameciiragia na ngoro. 20Nao arĩithi magĩcooka kũrĩ mahiũ maao, makĩgoocaga na magĩkumagia Ngai nĩ ũndũ wa maũndũ marĩa moothe mooneete na makaigua; maũndũ macio moothe maahaanaga o ta ũrĩa mũraika aameerĩĩte.
Jesũ gũtuuo rĩĩtwa
21 Na rĩĩrĩ, mĩthenya ĩnaana yahinga, kaana kau gakĩruithio na gagĩĩtwo Jesũ. Rĩĩtwa rĩu norĩo mũraika aakaheete o mbere nyina atarĩ aagĩa nda yako.
Jesũ gũtwarwo Hekaarũinĩ
22 Na rĩĩrĩ, ihinda nĩrĩakinyire rĩa Josefu na Mariamu rĩa kũruta igongoona rĩa gũtherio, o ta ũrĩa Watho wa Musa wathanĩĩte. Kwoguo magĩgĩtwara Jesũ Jerusalemu nĩguo magakaneane kũrĩ Mwathani. 23 Meekire ũguo kũringana na ũrĩa kwandĩkĩĩtwo Wathoinĩ wa Mwathani atĩ, “Kahĩĩ o goothe ka irigithaathi no nginya kamũragĩrwo Mwathani.” 24O na ningĩ nĩmaathiaga kũrutĩra Ngai igongoona rĩa ndirahũgĩ igĩrĩ kana tũtutuura twĩrĩ, kũringana na watho wa Mwathani.
25Hĩndĩ ĩyo nĩkwarĩ na mũndũ watũũraga Jerusalemu wetagwo Simeoni. Mũndũ ũcio aarĩ mũthingu na nĩatĩĩĩte Ngai, na aatũire eetereire ũhonokio wa andũ a Isiraeli. Roho Mũtheru aarĩ hamwe naake, 26na nĩamũmenyithĩĩtie atĩ ndagaakua atooneete Mesia ũrĩa weranĩirwo nĩ Mwathani. 27Simeoni nĩathiire Hekaarũinĩ atongoreetio nĩ Roho Mũtheru. Na rĩĩrĩ, rĩrĩa aciari a kaana kau ti Jesũ maagatwarire kũu Hekaarũ nĩ geetha mahingie ũrĩa Watho woigĩĩte, 28Simeoni agĩkooya, agĩcookeria Ngai ngaatho akiuga atĩrĩ:
29“Rĩu, Mwathani, nĩũkũreka ndungata yaku ĩkue na thaayũ,
tondũ nĩũhingĩĩtie kĩĩranĩro gĩaku kĩrĩa wamĩĩrĩire.
30Nĩ amu maitho maakwa nĩmeyoneire ũhonokio waku,
31ũrĩa ũthondekeete andũ oothe me ho,
32 nĩguo ũtheri wa kũguũrĩria andũ a ndũũrĩrĩ ciothe wendi waku,
na wa kũreehe ũkumio kũrĩ andũ aaku a Isiraeli.”
33Na rĩĩrĩ, ithe na nyina wa Jesũ nĩmaagegire nĩ ũndũ wa maũndũ macio Simeoni oigire maakoniĩ Jesũ. 34Naake Simeoni akĩmaraathima, agĩcooka akĩĩra nyina Mariamu atĩrĩ, “Mwana ũyũ athuurĩĩtwo nĩ Ngai nĩguo aanange na ahonokie andũ aingĩ thĩinĩ wa Isiraeli. Nĩagaakorwo arĩ kĩmenyithia kuuma kũrĩ Ngai, kĩrĩa andũ aingĩ makaaria maũndũ mooru igũrũ wakĩo, 35nacio hitho ciao ikĩmenyeke. Nakĩo kĩeha, kĩhaana ta rũhiũ rwa njora rũnoore, nĩgĩgaatheeca ngoro yaku.”
36Na rĩĩrĩ, o kũu nĩkwarĩ na mũtumia wa ndigwa mũkũrũ mũno warĩ mũnabii wetagwo Ana, mwarĩ wa Fanueli, wa mũhĩrĩga wa Asheri. Arĩĩkia kũhika aikarire na mũthuuriwe o mĩaka mũgwanja tu, 37mũthuuriwe agĩcooka agĩkua. Hĩndĩ ĩyo aarĩ na mĩaka mĩrongo ĩnaana na ĩna. Ndarĩ hingo oimaga Hekaarũinĩ; aatũũraga athaathayagia Ngai ũtukũ na mũthenya, akĩĩhingaga na akĩhooyaga.
38O hĩndĩ ĩyo mũtumia ũcio agĩkinya, agĩcookeria Ngai ngaatho na akĩaria ũhoro wa kaana kau kũrĩ andũ oothe arĩa maatũire meetereire Ngai ahonokie Jerusalemu.
Gũcooka Nazarethi
39 Hĩndĩ ĩrĩa Mariamu na Josefu maarĩĩkirie gwĩka maũndũ moothe kũringana na watho wa Mwathani, magĩcooka itũũrainĩ rĩao rĩa Nazarethi bũrũriinĩ wa Galili. 40Nako kaana kau gagĩkũra na gakĩgĩa na hinya; kaiyũrĩĩtwo nĩ ũũgĩ, na wega wa Ngai warĩ hamwe nako.
Jesũ Hekaarũinĩ
41 Na rĩĩrĩ, o mwaka aciari a Jesũ nĩmaathiaga Jerusalemu gũkũngũĩra thigũkũ ya Bathaka. 42Jesũ arĩĩkia kũhingia mĩaka ikũmi na ĩĩrĩ-rĩ, nĩmaathiire naake Jerusalemu, o ta ũrĩa maamenyereete gwĩka. 43Rĩrĩa Bathaka yathirire, makĩambĩrĩria rũgendo rwao rwa kũinũka, no kamwana kau ti Jesũ gagĩtigwo Jerusalemu. Aciari aako matiamenyire ũndũ ũcio; 44meeciiragia kaarĩ o gĩkundiinĩ kĩa andũ a kwao. Na rĩĩrĩ, mathiĩte rũgendo rwa mũthenya mũgima nĩrĩo maambĩrĩirie gũgacaria gatagatĩinĩ ka andũ aao na araata. 45Rĩrĩa maakaagire o biũ, magĩcooka kinya Jerusalemu, o magĩgacaragia. 46Thuutha wa mĩthenya ĩtatũ nĩguo maakoonire Hekaarũinĩ, gaikarĩĩte thĩ hamwe na arutani a Ayahudi, kamathikĩrĩirie gakĩmooragia ciũria. 47Andũ oothe arĩa maagathikĩrĩirie nĩmaagegaga nĩ ũndũ wa ũũgĩ wa macookio maako. 48Rĩrĩa aciari aako maakoonire makĩmaka, naake nyina agĩkooria atĩrĩ, “Mũũriũ, nĩ kĩĩ gĩtũmĩĩte ũtwĩke ũũ? Niĩ na thooguo tũkoreetwo na kĩeha mũno tũgĩgũcaria.”
49Naake Jesũ akĩmacookeria akĩmeera atĩrĩ, “Nĩ kĩĩ kĩratũma mũnjarie? Kaĩ mũtooĩ atĩ nĩnjagĩrĩirwo nĩ gũkorwo ndĩ nyũmbainĩ ya Awa?” 50No rĩĩrĩ, nyina na ithe matiamenyire ũrĩa aamacookeirie.
51Naake Jesũ agĩgĩcooka nao Nazarethi, na nĩamaathĩkagĩra. Naake nyina no aigaga maũndũ macio moothe ngoroinĩ yake. 52 Naake Jesũ agĩgĩkũra akĩũhigaga, akĩendagwo nĩ Ngai o hamwe na andũ.

Jesũ kũbatithio
(Mat 3.13-17; Mar 1.9-11)
21Na rĩĩrĩ, andũ oothe marĩĩkia kũbatithio, o naake Jesũ akĩbatithio. Rĩrĩa aahooyaga, igũrũ rĩkĩhingũka, 22 naake Roho Mũtheru agĩikũrũka igũrũ rĩake e na mwĩrĩ wahaanaga ta wa ndutuura. Naguo mũgambo ũkiuma igũrũ ũkiuga atĩrĩ, “Wee nĩ we Mũrũ wakwa nyendeete; nĩngenaga mũno nĩ we.”
Ndĩra cia Rũruka rwa Jesũ Kristũ
(Mat 1.1-17)
23Na rĩĩrĩ, Jesũ akĩambĩrĩria wĩra wake aarĩ wa mĩaka ta mĩrongo ĩtatũ. Kũringana na ũrĩa andũ meeciiragia, Jesũ aarĩ mũrũ wa Josefu, mũrũ wa Heli, 24mũrũ wa Mathati, mũrũ wa Lawi, mũrũ wa Meliki, mũrũ wa Janai, mũrũ wa Josefu, 25mũrũ wa Matathia, mũrũ wa Amosi, mũrũ wa Nahumu, mũrũ wa Shealitieli, 26mũrũ wa Maathi, mũrũ wa Matathia, mũrũ wa Semeini, mũrũ wa Joseki, mũrũ wa Joda, 27mũrũ wa Joanani, mũrũ wa Resa, mũrũ wa Zerubabeli, mũrũ wa Shealitieli, mũrũ wa Neri, 28mũrũ wa Meliki, mũrũ wa Adi, mũrũ wa Kosama, mũrũ wa Elimadami, mũrũ wa Eri, 29mũrũ wa Joshua, mũrũ wa Eliezeri, mũrũ wa Jorimu, mũrũ wa Mathati, mũrũ wa Lawi, 30mũrũ wa Simeoni, mũrũ wa Juda, mũrũ wa Josefu, mũrũ wa Jonamu, mũrũ wa Eliakimu, 31mũrũ wa Melea, mũrũ wa Mena, mũrũ wa Matatha, mũrũ wa Nathani, mũrũ wa Daudi, 32mũrũ wa Jesii, mũrũ wa Obedi, mũrũ wa Boazu, mũrũ wa Salimoni, mũrũ wa Nahashoni, 33mũrũ wa Aminadabu, mũrũ wa Adimini, mũrũ wa Aruni, mũrũ wa Hezironi, mũrũ wa Perezu, mũrũ wa Juda, 34mũrũ wa Jakubu, mũrũ wa Isaaka, mũrũ wa Aburahamu, mũrũ wa Tera, mũrũ wa Nahori, 35mũrũ wa Serugu, mũrũ wa Reu, mũrũ wa Pelegi, mũrũ wa Eberi, mũrũ wa Shela, 36mũrũ wa Kainani, mũrũ wa Arifakishadi, mũrũ wa Shemu, mũrũ wa Noa, mũrũ wa Lameki, 37mũrũ wa Methusela, mũrũ wa Enoku, mũrũ wa Jaredi, mũrũ wa Mahalaleli, mũrũ wa Kenani, 38mũrũ wa Enoshu, mũrũ wa Sethu, mũrũ wa Adamu, mũrũ wa Ngai.