Nazareth khua ah Zeisu leh a nu leh apa tawh hong teng uh hi. Laisiangtho sung ah ama khangno lai in a innkuan un Jerusalem khua ah kumsim khualzin in Pawisim ding cih thu bek kingelh hi. Kum sawmleh kumnih a phaktak ciang in mipi kawm ah a nu te in nusia kha uh aa Biakinn pi sung ah Mipil te tawh Pasian thu agenna ih muh ciang in a ma pilna bang zah in lamdang hiam cih ki mu thei hi.
Anung laimai tung a thute:
Biakinn sungah Naupang Jesuh
41 Kumsimin Jerusalem khua-a Paisan Pawi a kibawlna-ah Jesuh’ nu leh pa a pai zel uh ahi hi.
42 Jesuh, kum sawmlenih a phak ciangin a ngeina bangin tua pawi-ah a thumun a pai uh hi.
43 Tua pawi vengin a ciahkik uh ciangin Jerusalem khua-ah naupang Jesuh kinusia kha hi. A nu leh a pa in a nusiatlam uh theilo uh hi.
44 Amaute’ honlak mahah a omomin ngaihsun uh ahih manin ni khat lam paikhin uh a, tua ciangin a lawmte leh a tanaute lak khawng a zong pan uh hi.
45 Amah a muh zawhloh uh ciangin Jerusalem-ah kileh kikin a zong uh hi.
46 A ciahzawh uh a ni thum ni ciangin biakinn sungah amah mu uh a, siate lakah tu-in a thugen uh ngai-in, thu zong dong zelin a om a mu uh hi.
47 Amah in pilna tawh thu genin a dawn’na a za mite khempeuh in lamdangsa mahmah uh hi.
48 A nu leh a pa in a muh uh ciangin lamdangsa uh a, a nu in, ?Ka ta aw, bang hangin hong hici bawl na hi hiam? Na pa tawh lungkham mahmahin nang ka hong zong uh hi,? a ci hi.
49 Jesuh in a nu leh a pa kiangah, ?Bang hangin kei hong zong na hi uh hiam? Ka Pa’ inn sungah ka om ding lamtak theilo na hi uh hiam?? ci-in a dawng hi.
50 Ahi zongin bang a cihnopna ahi hiam, ci-in a nu leh a pa in theilo uh hi.
51 Tua ahih ciangin a nu leh a pa zui-in Nazareth khua-ah ciahkik a, amaute’ thu mangin tua lai-ah hoihtakin a om hi. A nu in hih thu khempeuh a lungsim sungah ngaihsunsun hi.
52 Jesuh a pumpi leh a pilna khang a, ama gamtatna in Pasian leh mite a lungkimsak semsem hi.
Luka 2:41-52
leh
Egypt Gam Pan Ciahkikna
19 Herod a sih khit ciangin Egypt gama om Josef kiangah Topa’ vantung mi khat hong kilang a,
20 “Naupang a that nuam mite si khinta ahih ciangin kithawi in la, naupang leh a nu tawh Israel gamah ciah un,” a ci hi.
21 Josef zong kithawi-in, naupang leh a nu tawh Israel gamah a ciah uh hi.
22 Ahi zongin Arkhelaus in a pa Herod’ za laihin Judea gam uk mahin a omna thu a zak ciangin tua gamah Josef ciah ngamlo hi. Tua ahih manin a mang sung mahah a kihilna bangin Galilee gamsungah lutin,
23 Nazareth khua-ah a teng uh hi. Kamsangte in, “Amah pen Nazareth khuami kici ding hi,” ci-in a genkholhna a tun’na dingin hih bangin a piang ahi hi.
Matthai 2:19-23
Theihding thu omlai:
Zeisu nu leh pa in a muh uh ciang in inn ah a ciahpih uh hi.
Hih unit sung ah a dang sinna te:
- Vantungmi Gabriel in Zeisu suah nading thu Mary tungah gen, Luka 1:26-38
- Mary kiangah vantungmi Gabriel hawh hi, Luka 1:39-40
- Elizabeth kiangah Mary hawh, Luka 1:41-45
- Mary in Pasian tungah phatna lasa, Luka 1:46-56
- Joseph mang sungah vantungmi khat kilang, Matthai 1:18-25
- Bethlehem khua ah Joseph pai, Luka 2:1-4
- Mazih lano tung tuang in Joseph tawh khualzinna, Luka 2:5
- Naungek no Zeisu hongsuak, Luka 2:6-7 leh Mate 1:18-25
- Tucing te’n encik uh hi, Luka 2:8-12 leh Luka 15-20
- Vantung mite’n hong suak Zeisu hang in Pasian phat uh, Luka 2:13-14
- Zeisu ni 40 a cin ciang in Biakinn pi ah vaap na, Luka 2:22-24
- Simeon in Zeisu thupha pia, Luka 2:25-35
- Kamsang nu Anna, Luke 2:36-38
- Mipil thum te Zeisu zong dingin nisuah na lam pan khualzin uh , Mate 2:1-2
- Mipil thum te Herod kiang ah vahawhna, Mate 2:3-8
- Mipil thum ten aksi pi zui uh, Mate 2:9-10
- Innsung ah Zeisu naungekno khat, Mate 2:11-12
- Joseph in Zeisu Egypt gam ah taikhiatpih, Mate 2:13-15
- Herod Mangpipa- Zeisu thahding asawm masak na, Mate 2:16-18
- Egypt gam pan Nazareth khua hong ciahkik na, Mate 2:19-23
- Kum sawmleh kumnih apha Zeisu thu, Luka 2:41-52
- Singlamteh hongpai laiding hi, Luka leh Mate sung ah sim in